2025 жылғы 14 қарашада Астана қаласында жастардың бос уақытын ұйымдастыру және олардың күнделікті өмір сүру жағдайларына қатысты қоғамдық тыңдау өтті. Талқылаудың бастамашысы Астана қаласының Қоғамдық кеңесі болды. Бұл жолы Кеңес формалды баяндамаларға емес, тірі диалогқа және көшпелі форматтағы жұмысқа басымдық берді.
Жастардың бос уақытын ұйымдастыру мәселесін олардың өмір сүретін, оқитын және уақыттарының басым бөлігін өткізетін жағдайларынан бөлек қарастыру мүмкін емес. Сондықтан қоғамдық тыңдау бір ғана зал аясымен шектелмей, студенттік ортаға тікелей қатысты негізгі нысандарды аралау форматында ұйымдастырылды.
Қоғамдық кеңес мүшелері Л.Н. Гумилев атындағы Еуразия ұлттық университетінің жатақханасына барып, Coventry University Kazakhstan кампусын көріп шықты, сондай-ақ JOLTAP жастар жобасының қызметімен танысты. Мұндай формат инфрақұрылым мен тұрмыс жағдайларын көзбен көруге ғана емес, студенттердің өз пікірін тікелей естуге мүмкіндік берді.
Жастар өз бақылауларымен ашық бөлісіп, күнделікті кездесетін қиындықтарды және қалалық ортадан күтетін үміттерін айтты. Әңгімелесу барысында бос уақытты ұйымдастыру тақырыбы жастардың мобильдігімен, көлік қолжетімділігімен және оқу орындарының айналасындағы кеңістікті ұйымдастыру мәселелерімен тығыз байланысты екені айқын көрінді.
Кездесу барысында қатысушылар көлік мәселесіне ерекше назар аударды. Студенттер қосымша автобус бағыттарын іске қосу және қолданыстағы маршруттарды қайта қарау қажеттігін айтты. Олардың пікірінше, көлік қолжетімділігінің шектеулілігі мәдени, спорттық және қоғамдық іс-шараларға қатысуға жиі кедергі келтіреді.
Сонымен қатар, жатақханалар мен оқу орындарының айналасындағы аумақтарды абаттандыру, сондай-ақ студенттердің жайлы өмір сүруіне қажетті инфрақұрылымды дамыту мәселелері де көтерілді. Қоғамдық тыңдау жастардың ашық диалогқа дайын екенін және қалалық шешімдерді талқылауға белсенді қатысуға қызығушылық танытатынын көрсетті.
Сонымен бірге, көтерілген көптеген мәселелер жүйелі көзқарасты және мемлекеттік органдар арасындағы одан әрі үйлестірілген өзара іс-қимылды талап ететіні атап өтілді. Кездесулер барысында айтылған барлық ұсыныстар мен ескертулер Қоғамдық кеңес мүшелері тарапынан тіркеліп, кейінгі қарастыру үшін бақылауға алынды.
Қоғамдық тыңдау қорытындысы бойынша Астана қаласының Қоғамдық кеңесі аталған тақырып бойынша жұмысты жеке отырыс форматында жалғастыру туралы шешім қабылдады. Бұл отырыс жастардың бос уақытын ұйымдастыру мәселелеріне, олардың өмір сүру жағдайларына, көлік қолжетімділігіне және қалалық инфрақұрылымды дамытуға арналған болады. Талқылауға профильдік мемлекеттік органдар мен мүдделі тараптарды тарту жоспарланып отыр.
Өткізілген қоғамдық тыңдау жастар мен қоғамдық бақылау институттары арасындағы диалогты жүйелі түрде қалыптастыруға бағытталған жұмыстың бір бөлігіне айналды. Мұндай формат проблемалық мәселелерді анықтауға ғана емес, сонымен қатар елорданың жас тұрғындарының күтулері мен қажеттіліктерін тереңірек түсінуге мүмкіндік береді, бұл қалалық ортаны әрі қарай дамыту мен жастар саясатын жетілдірудің маңызды шарты болып табылады.